விருப்ப செக்ஸுக்கான தகுதி வயதை 12 ஆக குறைப்பு இல்லை-அரசு முடிவு

விருப்பத்துடன் கூடிய செக்ஸ் உறவை வைத்துக் கொள்வதற்கான தகுதி வயதை 16 என்பதிலிருந்து 12 ஆக குறைக்க வகை செய்யும் சட்ட அம்சத்தை மத்திய அரசு கைவிட்டுள்ளது.

செக்ஸ் குற்றங்களிலிருந்து சிறார்களைப் பாதுகாக்கும் வரைவுச் சட்டத்தை அரசு உருவாக்கியுள்ளது. இதில் விருப்பத்துடன் கூடிய செக்ஸ் உறவில் ஈடுபடுவோருக்கு தற்போது குறைந்தபட்ச வயதாக 16 என்று உள்ளதை 12 ஆகக் குறைக்கும் அம்சமும் இடம் பெற்றிருந்தது.

12 வயது மற்றும் அதைத் தாண்டியவர்கள் விருப்பத்துடன் செக்ஸ் வைத்துக் கொள்வது சட்டவிரோதமானதல்ல என்று இந்த சட்டப் பிரிவு கூறுகிறது. அதேசமயம், தற்போது குறைந்தபட்ச வயது 16 என்று இருப்பதையும் குறைக்கவும் சட்ட அம்சம் வகை செய்கிறது. இருப்பினும், தற்போது இந்த அம்சத்தை அரசு நீக்கி விட்டது.

வரைவு சட்டத்தின் நகலை அனைத்து மாநிலங்களுக்கும் மத்திய அரசு அனுப்பி கருத்து கேட்டுள்ளது என்பது குறிப்பிடத்தக்கது. இந்த நிலையில், 12 வயது என்ற அம்சத்தை மத்திய அரசு கைவிட்டுள்ளது. அதேசமயம், தற்போது உள்ளபடியே குறைந்தபட்ச வயது 16 ஆக நீடிக்கும் என்று மத்திய மகளிர் மற்றும் சிறார் நலத்துறை அமைச்சர் கிருஷ்ணா தீரத் தெரிவித்தார்.